le capro expiatori

Ramses e Rudhyar esseva duo veteranos qui habitava in le mesme citate. Le prime era un emigrante recentemente establite in le citate natal de Rudhyar, durante que Rudhyar sempre viveva ibi. Un die illes se incontrava al café de lor quartiero durante un match de football, que ambes reguardava con attention. Post alcun commentos, in alte voce, super le performance e le occurrentias del match, illes comenciava facer lor commentarios ora non verso le televisor, ma verso le altero. Bira, arachide, critos e commentarios plenava le ambiente ubi iste duo amantes de football se cognosceva. Post finir le match e pagar lor dispensas illes diceva adeo e retornava a lor casas. 

-
Passate alcun tempore, Ramses e Rudhyar se incontrava de novo al mesme café. Illes se complimentava e conversava un poco super le match que irea comenciar intra alcun minutas. (Iste joco esseva importante pro le equipa de Rudhyar, pois que si illo lo ganiava alora illo serea un del finalistas del competition, cuje final irea haber loco al extero). Ab le conversation inter illes facilemente se discerneva que Rudhyar era un partisano del equipa de su quartiero e que Ramses – qui era partisano de un equipa de su pais – comenciava ora a sympathisar con le team del quartiero ubi ille habitava actualmente. Anque durante le commentarios on poterea notar que illes habeva characteres distincte: Ramses esseva polite – ben que un poco adonis –, durante que Rudhyar esseva un persona basse, con un tono rude e vociferante – on le appellava “le Rude”, hypocoristic- o depreciativemente. 

Intertanto le joco comenciava e ambes dirigeva lor reguardos verso le televisor. Passate plus o minus un quarto de hora il habeva un grave sanction contra le equipa de Rudhyar, qui subitemente se levava e comenciava vociferar contra le arbitro: 

− Fur! Aperi le oculos! − E post diriger su reguardo verso le companion. − Esque tu videva como nos esseva robate per iste filio de puta? 

Ramses non amava iste tono de Rudhyar e le diceva: 

− Tu debe haber calma. Isto son cosas que occurre. 

Rudhyar non retorqueva, pois que su attention esseva trahite per un goal que su equipa faceva. Subitemente Rudhyar e Riomar, un vicino e collega de ille, se levava e exuberantemente critava ambes a plen pulmones: 

− Goaaaalllllll! Goaaaalllllll!... Goal, goal, goal! 

Intertanto finiva le prime parte del match, ma non le vituperationes contra le arbitro qui, per hasardo, esseva un amico de Ramses, e qui, intertanto, con un error crasse favoriva le altere equipa. Post recomenciar le match occurreva de novo un situation que disagradava a Rudhyar e presto comenciava pluver un cumulo de insultos contra le arbitro. Ramses esseva indignate e diceva: 

− Joca le balla, non le homine. 

Alora Riomar, qui interveniva le prime vice in le conversation, demandava: 

− Ma qui committe le errores? Es le balla? 

E plen del interventiones de Ramses, le demandava de novo: 

− Que dice tu? Que ha tu? 

Ramses non habeva le tempore pro retorquer, porque post un curte pausa Riomar continuava: 

− Respira tranquille, homine, porque tu demonstra nervosismo... − E in argot, ille finiva. − Va in mona! 

Rudhyar non prestava attention al dialogo inter illes; ille esseva plus interessate al match e al resultato final. Intertanto, de novo un situation disfavorabile al equipa local faceva exploder Rude. 

− Filio de puta, va apprender le regulas! Cornuto, va mangiar merda! 

Isto esseva troppo pro le fin aures de Dandy – como illes supernominava Ramses – e ille se levava e diceva un poco irate: 

− Vos face me pensar in secar le ligamines que io ha con tote le partisanos de vostre equipa. Io pensava assister al final le proxime mense, ma ora mesmo io decideva non facer lo pro evitar que io trova illac personas rude como vos. 

Post dicer isto ille sortiva hastivemente. 

Rudhyar, sin mesmo reguardar le, murmurava in basse voce – pro si mesme e pro Riomar: 

− Ancora un false partisano qui vole facer de mi le capro expiatori...

3 comments:

  1. Il pare que Ramses diceva que ille non voleva assister a un renunion futur que habeva un persona tanto rude como Rudhyar. Le rudessa mesmo ha facite le pensar de secar le ligamines al partisanos de Rudhyar. Mais io non pensa que ille lo faceva. Illo solmente monstrava como extreme esseva le rudessa de Rudhyar que illo faceva le haber iste pensatas! Pensar non es semper facer.
    Rudhyar non voleva acceptar le characterization de su comportamento como tanto rude per deflecter lo a partir de ille in tractar le como un capro expiatori pro su gruppo de partisanos. Le capro expiatori es non jammais culpabile, mais solmente un substituto pro le un qui es in veritate culpabile.

    ReplyDelete
  2. Que es le connexion de iste conto con Piet Cleij?

    ReplyDelete